ಹರ ಹರ ಮಹದೇವ

ಶಿವಪವಿತ್ರಾರೋಪಣ ಎಂದರೆ : “ದೇವಾಲಯದಲ್ಲಿ ನಡೆಯುವ ಧಾರ್ಮಿಕ ಪೂಜಾ ಕೈಂಕರ್ಯಗಳ ಲೋಪದೋಷಗಳನ್ನು ಪರಿಹರಿಸಿ, ದೇವರ ಸನ್ನಿಧಿಯ ಪಾವಿತ್ರ್ಯವನ್ನು ಪುನಃಸ್ಥಾಪಿಸಿ, ಲೋಕಕಲ್ಯಾಣಕ್ಕಾಗಿ ಶಿವನಿಗೆ ಪವಿತ್ರವನ್ನು ಸಮರ್ಪಿಸುವ ವಿಶೇಷ ಆಗಮಿಕ ವಿಧಿಯೇ ಶಿವ ಪವಿತ್ರಾರೋಪಣ.”

ಅರ್ಥ: ಶಿವ ಪವಿತ್ರಾರೋಪಣವು ಶಿವಾಲಯಗಳಲ್ಲಿ ನಡೆಯುವ ಅತ್ಯಂತ ಪವಿತ್ರವಾದ ಆಗಮಿಕ ಆಚರಣೆ. ಇಲ್ಲಿ “ಪವಿತ್ರ” ಎಂದರೆ ಮಂತ್ರಶಕ್ತಿಯಿಂದ ಶುದ್ಧೀಕರಿಸಲಾದ ಪವಿತ್ರ ಸೂತ್ರ/ದಾರ ಮತ್ತು “ಆರೋಪಣ” ಎಂದರೆ ಅದನ್ನು ಶಿವನಿಗೆ ಸಮರ್ಪಿಸಿ ಧಾರಣೆ ಮಾಡಿಸುವುದು.

ಯಾಕೆ ಆಚರಿಸಲಾಗುತ್ತದೆ: ದೇವಾಲಯದಲ್ಲಿ ಒಂದು ವರ್ಷ ಅಥವಾ ನಿರ್ದಿಷ್ಟ ಅವಧಿಯಲ್ಲಿ ನಡೆದ ನಿತ್ಯಪೂಜೆ, ನೈವೇದ್ಯ, ಅಭಿಷೇಕ, ಉತ್ಸವ ಮತ್ತು ಇತರ ಧಾರ್ಮಿಕ ಕಾರ್ಯಗಳಲ್ಲಿ ಉಂಟಾಗಿರಬಹುದಾದ ತಿಳಿದ-ತಿಳಿಯದ ಲೋಪದೋಷಗಳ ನಿವಾರಣೆ ಹಾಗೂ ಧಾರ್ಮಿಕ ಶುದ್ಧೀಕರಣಕ್ಕಾಗಿ ಈ ವಿಧಿಯನ್ನು ಆಚರಿಸಲಾಗುತ್ತದೆ.

ನಮ್ಮದೇವಸ್ಥಾನದ ಆಚರಣೆ: ಶ್ರೀದೇವಸ್ಥಾನದಲ್ಲಿ ಶ್ರಾವಣ ಶುದ್ಧ ತೃಯೋದಶಿಯಂದು ಪಾರಂಪರಿಕವಾಗಿ ಆಗಮೋಕ್ತ ವಿಧಿ ವಿಧಾನಗಳಮೂಲಕ ಶ್ರೀದೇವಸ್ಥಾನದ ಪ್ರಧಾನ ಅರ್ಚಕರು ಮತ್ತು ತಂತ್ರಿಕರು ನೆಡೆಸಿಕೊಂಡು ಬಂದಿರುವ ಧಾರ್ಮಿಕ ಆಚರಣೆಯಾಗಿದೆ. ಈ ದಿನದಂದು ಹೋಮ ಹವನಾದಿಗಳು ಮತ್ತು ವಿಶೇಷ ನೈವೇದ್ಯ ಸಹಿತ ಪೂಜಾ ಕೈಂಕರ್ಯಗಳು ನೆರವೇರುತ್ತದೆ. ಸಮರ್ಪಿಸಿದ ಪವಿತ್ರ ದಾರಗಳನ್ನು ಶ್ರೀದೇವಸ್ಥಾನದ ತಾಂತ್ರಿಕರು, ಯಜಮಾನರು, ಉಪಾದಿವಂತರು ಮತ್ತು ಚಾಕರಿವಾನರಿಗೆ ನೀಡಲ್ಪಡುತ್ತದೆ. ಇದೊಂದು ವಿಶೇಷವಾದ ಸಂದರ್ಭವಾಗಿದ್ದು ಶ್ರೀದೇವರ ರಕ್ಷೆಯನ್ನು ಧರಿಸುತ್ತಾರೆ. ಇದೊಂದು ಹಿಂದಿನ ಕಾಲದಿಂದಲೂ ನೆಡೆದುಕೊಂಡ ಬಂದಿರುವ ಪದ್ದತಿಯಾಗಿರುತ್ತದೆ. ಈ ದಿನದ ವಿಶೇಷ ಆಚರಣೆಯು ಶ್ರೀದೇವಸ್ಥಾನದ ಭಕ್ತರಿಗೆ ಪವಿತ್ರವಾಗಿದೆ.

ಇಟಗಿ, 24 ಆಗಸ್ಟ್ 2026:
ಶ್ರಾವಣ ಮಾಸದ ಪವಿತ್ರ ಎರಡನೇ ಸೋಮವಾರದ ಅಂಗವಾಗಿ ಶ್ರೀಕ್ಷೇತ್ರ ಇಟಗಿಯ ಬಿಳಗಿ ಸೀಮಾ ಮಹತೋಬಾರ ಶ್ರೀರಾಮೇಶ್ವರ ಶ್ರೀ ಅಮ್ಮನವರು ಹಾಗೂ ಶ್ರೀ ವಿಠ್ಠಲ ದೇವಸ್ಥಾನದಲ್ಲಿ ವಿವಿಧ ಧಾರ್ಮಿಕ ಹಾಗೂ ವಿಶೇಷ ಸೇವಾ ಕಾರ್ಯಕ್ರಮಗಳು ಭಕ್ತಿಭಾವದಿಂದ ನೆರವೇರಿದವು.

ಶ್ರಾವಣ ಮಾಸದ ಪಾವಿತ್ರ್ಯಕ್ಕೆ ವಿಶೇಷ ಮಹತ್ವವಿರುವ ಹಿನ್ನೆಲೆಯಲ್ಲಿ, ದೇವಸ್ಥಾನದಲ್ಲಿ ವಿಶೇಷ ಪೂಜಾ ವಿಧಿವಿಧಾನಗಳು ಹಾಗೂ ಸೇವಾ ಕಾರ್ಯಕ್ರಮಗಳು ನಡೆದವು. ವಿವಿಧ ಗ್ರಾಮಗಳು, ನಗರಗಳು ಆಗಮಿಸಿದ ಭಕ್ತರು ತಮ್ಮ ಕುಟುಂಬದ ಪರವಾಗಿ ವಿವಿಧ ಸೇವೆಗಳನ್ನು ಸಲ್ಲಿಸಿ ಶ್ರೀರಾಮೇಶ್ವರ ದೇವರ ಕೃಪೆಗೆ ಪಾತ್ರರಾದರು.

ಶ್ರಾವಣ ಪ್ರಸಾದ ಭೋಜನ ಸೇವೆ: ಶ್ರಾವಣ ಎರಡನೇ ಸೋಮವಾರದಂದು ಭಕ್ತರಿಗೆ ಪ್ರಸಾದ ಭೋಜನ ಸೇವೆಯನ್ನು ಶ್ರೀ ಉಮೇಶ ಸುಬ್ರಾಯ ಹೆಗಡೆ, ಕೊಡ್ತಗಣಿ – ಕ್ಷೇಮಾ ಡಿಸ್ಟ್ರಿಬ್ಯೂಟರ್ಸ್‌, ಸಿದ್ದಾಪುರ, ಶ್ರೀಮತಿ ಅಮೃತಾ ರಾಮಕೃಷ್ಣ ಜೋಷಿ, ಗೋಕರ್ಣ – U.S.A. ಹಾಗೂ ಶ್ರೀ ಕನ್ನಪ್ಪ ದ್ಯಾವಾ ಗೌಡ, ಹರ್ಗಿ ಜಡ್ಡಿ ಅವರು ಭಕ್ತಿಪೂರ್ವಕವಾಗಿ ಸಲ್ಲಿಸಿದರು.

ಸೇವಾಕರ್ತರ ಸಹಕಾರದಿಂದ ಭಕ್ತರಿಗೆ ಪ್ರಸಾದ ಭೋಜನ ವ್ಯವಸ್ಥೆ ಅಚ್ಚುಕಟ್ಟಾಗಿ ನೆರವೇರಿತು. ಭಕ್ತರು ಪ್ರಸಾದ ಸ್ವೀಕರಿಸಿ ದೇವರ ದರ್ಶನ ಪಡೆದು ಪುನೀತರಾದರು.

ಸರ್ವಾಲಂಕಾರ ಸೇವೆ: ಶ್ರಾವಣ ಎರಡನೇ ಸೋಮವಾರದ ವಿಶೇಷ ಸಂದರ್ಭದಲ್ಲಿ ಶ್ರೀ ಉಮೇಶ ಸುಬ್ರಾಯ ಹೆಗಡೆ, ಕೊಡ್ತಗಣಿ – ಕ್ಷೇಮಾ ಡಿಸ್ಟ್ರಿಬ್ಯೂಟರ್ಸ್‌, ಸಿದ್ದಾಪುರ ಅವರು ಸರ್ವಾಲಂಕಾರ ಸೇವೆಯನ್ನು ಸಲ್ಲಿಸಿದರು.

ಶ್ರೀರಾಮೇಶ್ವರ ದೇವರ ಸೇವಾ ಕಾರ್ಯಗಳಲ್ಲಿ ಭಕ್ತಿಯಿಂದ ಭಾಗವಹಿಸಿ, ಪ್ರಸಾದ ಭೋಜನ, ಸರ್ವಾಲಂಕಾರ ಹಾಗೂ ಶತರುದ್ರ ಹವನ ಸೇವೆಗಳಿಗೆ ಸಹಕಾರ ನೀಡಿದ ಎಲ್ಲಾ ಸೇವಾಕರ್ತರಿಗೆ ದೇವಸ್ಥಾನದ ಆಡಳಿತ ಮಂಡಳಿಯ ವತಿಯಿಂದ ಹೃತ್ಪೂರ್ವಕ ಕೃತಜ್ಞತೆಗಳು.

ಭಕ್ತರ ಸಹಕಾರ ಮತ್ತು ಸೇವಾ ಮನೋಭಾವದಿಂದ ಶ್ರೀಕ್ಷೇತ್ರ ಇಟಗಿಯ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಪರಂಪರೆ ನಿರಂತರವಾಗಿ ಮುಂದುವರಿಯುತ್ತಿದೆ.

ಶ್ರೀರಾಮೇಶ್ವರ ದೇವರ ಅನುಗ್ರಹವು ಎಲ್ಲಾ ಭಕ್ತರ ಮೇಲಿರಲಿ.

ಶ್ರಾವಣ ಮಾಸದ ಧಾರ್ಮಿಕ ಸೇವೆಗಳಿಗೆ ಭಕ್ತರ ಸಹಕಾರವನ್ನು ಸದಾ ಸ್ವಾಗತಿಸಲಾಗುತ್ತದೆ.

ಓಂ ನಮಃ ಶಿವಾಯ
ಶ್ರೀರಾಮೇಶ್ವರಾಯ ನಮಃ